NAKA-FULL ALERT na ang Philippine National Police (PNP) sa Bangsamoro Autonomous Region in Muslim Mindanao (BARMM) para sa kauna-unahang Parliamentary Elections na gaganapin sa Lunes, Setyembre 14.
Magtatagal ang heightened security posture ng PNP sa BARMM hanggang Setyembre 30.
Mula sa dating 9,435 police personnel, itinaas sa 10,439 ang bilang ng mga pulis na ipakakalat sa rehiyon para sa halalan.
Sa kabuuang bilang, 4,979 ang magmumula sa Police Regional Office–BARMM (PRO-BARMM), habang 5,460 ang augmentation forces mula sa iba’t ibang police units.
Itatalaga ang mga tauhan sa mga voting center, checkpoints, quick reaction forces (QRFs), gayundin sa mga tanggapan ng Commission on Elections (Comelec) at treasurer’s offices. Magkakaroon din ng crowd dispersal management (CDM) teams, Regional Special Strike Force (RSSF) at Explosive Ordnance Disposal (EOD)/K9 units.
Aabot naman sa 1,754 pulis ang magsisilbing Special Electoral Boards.
Samantala, 93 bayan at lungsod sa BARMM ang idineklarang election areas of concern. Kabilang dito ang 15 green, 39 yellow, 27 orange at 27 red areas.
Pinakamarami ang nasa Lanao del Sur na may 40 election areas of concern, kabilang ang 21 lugar na nasa red category.
(TOTO NABAJA)
89 
